Mar 13 | WEDTOPURA | STEP | Maranaina Yesu temple i hopuhopu tawanei ana tauvotaghotagho tagogi i riwai ipa, “Tauviharaharamana ma inanahi, gha'imahi hi ra'ata ghagha ma numahi inanahi hi ahi ghagha!”

Mark 13

Yesu temple viapoapoenana i dedei.

(Mat 24:1-2; Luk 21:5-6)

1 Maranaina Yesu temple i hopuhopu tawanei ana tauvotaghotagho tagogi i riwai ipa, “Tauviharaharamana ma inanahi, gha'imahi hi ra'ata ghagha ma numahi inanahi hi ahi ghagha!”

2 Yesu i pari-beyei, “We'i numahi ahiahihi, e inainanahi hina dabarara pahi da egha metauna ana au gabu ina mae terei.”

Piripiri ma rauivi apoapoe.

(Mat 24:3-14; Luk 21:7-19)

3 Yesu Olives au oyana i tughutughura temple au baba ghehauna ma Peter, James, John ma Andrew hi nae da govagovaghanei hi rau-bayadei. 4 “Ma riwe'ai, wei kauwahi meyanai hina tupuwa ma matakirahana aiwa'i”

5 Yesu i riwehi “Ona inana kauwa da egha aiya'i ina morumi, 6 Muriyai rava wava'uwei hina nei. Ma hina riwemi da, yamna Keriso ma rava maghamaghauhi hinavi deghahi. 7 Maranai ghaviya tuyeghana ma gugurana u nonori, egha ma rovorovo. We'i kauwahi hina tupuwa, wate yamna egha damona. 8 Dam hina vomahiri ma dam ghehauhi maitehi hinavi tonavivira ma guyaguyau hina vomahiri ma hinavi tonavivira. Yoyo ma gomara, dobu ghehauhi auwarihi hina tupuwa. We'i kauwahi yamna me wavine ana viyara evivi kareni vinatuna au marana.”

9 Matami ina kaya ma ona inana kauwa! Rava hina panimi ma hina naiyemi rauhetara au gabuna. Ma pari au numana hina kwapumi ma babada da guyaguyau hina rau-hetahetaremi ma aubaiu onavi taudede. 10 Wate muriyai da mara damona ina ghe'eta, tuyegha ahi'ahina, rava anatapuhi auwarihi hina rau-guguyei. 11 Maranaina hina panim, rauhetara aubaina, aiwa'i ona yatoyatoniya aubaina egha onavi nuwaboya. Rauhetara au marana aiwa'i o yatoyatoniya anina ona yatoni, aubaina na riwana yamna egha tamei ma Aruwa vivivireinei. 12 “Rava varehihi hinavi benabenamehi ma hinavi hiraghenhi, ama nana'arena natuna auwarihi ina kauwehi. Ma rowarowa amamahi da ayoyohi hinavi ghaviyehi ma hinavi hiraghenihi. 13 Rava anatapuhi hinavi ghaviyemi aubaiu. Ma aiya'i da evivi patutu ghavata au damona ina yawahana.”

Nuwaboya ghaeghaena ana mara

(Mat 24: 15-28; Luk 21:20-24)

14 Yesu i riwa, “Apo inana vihini rovorovona au naomi, ona inanai, mepa egha uta ghoheghoheiyana, ina mahimahiri.” ^{▼▼13:14Dan 9:27, 11:31, and 12:11} (Ona haramanei da we'i anona aiwa'i) “Tauhi au Judiya maemaehi hina ruba da hina nae au oya. 15 Aiya'i numa au tepana, e ma'ama'ae egha ina gha'ira numa au horana, purapura vainana aubaina. 16 Nana'arena aiya'i da ana au vaovao evo vobagibagi egha ina naeme au numa, ana puru vainana aubaina. 17 Waivine duwaduwamahi mavivi ghughuhi apo hinavi nuwa apoapoe kauwa 18 God onavi baghai da we'i kauwahi egha ina tupuwa au marahuba. 19 Ma nai au marana vinuwa'apo'apoe ma hini viyara gha'egha'ena ina tupuwa. Marainana God dobu i kauwei ma i nei da marina egha nana'arena ita tupuwa. Ma egha meyanai ina tupuwame. 20 Bada mara i ravi tupoi da rava hina yawahana ma ita pa e'egha, apo egha aiya'i ghehauna ita yawahana dadana. Bada ana rava vinevinehi aubaihi da mara ivi tupoi.”

21 “Nai au marana mepa aiya'i da e ririwem, ‘Mesaiya weka’, bo ‘Ma inana, Mesaiya no'ore!’ Egha mavi tumaghanei. 22 Anona yamna Mesaiya ma peroveta morumoruhi he nenei. Tauhi apo matakiraha ma anibaha kauwahi hina kauwehi, rava ma God ana rava vinevinehi maitehi hitavi deghahi. 23 Matami ina kaya ma ona inana kauwa! Aiwa'i anataputapuna a riwanapahiyemi.”

Rava natuna ana nememei

(Mat 24:29-31; Luk 21:25-28)

24 “Wate nai apo'apoena au murina,

‘madegha egha ina rarana ^{▼▼13:24Isa 13:10}
ma nawaravi ina gimtonei.
25 Au yada Kipora hina dabadabarara’
ma mara purapurahi ghaeghaehi ma viviriwapanahi hinavi guhuguhu.” ^{▼▼13:25Isa 34:4}
26 “Ma nai au marana, Rava Natuna hapauwei ana riwapanana ma ana boruborumana ona inanai ina ne'i. ^{▼▼13:26Dan 7:13} 27 Ma tauna aneya inapari tawanehi da hina nae dobu au mutuna da au mutuna ma God rava i vinevinehi anatapuna hina taravainihi.”

Kaiyaha awanaina

(Mat 24:32-44; Luk 21:29-33)

28 Anina ma Yesu i riwa, “Kaiyaha ona inanai ma inavi haraharamanimi. Maranaina raghana e numonumo, ma haramanei da ai'uwa'uwa e tuturiya'i. 29 Nana'arena, maranaina, we'i kauwahi u inanai da e tuputupuwa yamna ma haramanei da Rava Natuna e tuturatum. 30 Ta'u, anina a ririwemi, we'i kauwana ina tupuwa, muriyai da rava we au dobuna maemaehi hina hiraghe pahinihi. 31 Mara ma dobu ina hamo'a wate ta'u riwa'u egha meyanai ina hamo'a.”

Bada ana nememei marana egha aiyai ita haramanei

(Mat 24:36-44)

32 Egha aiya'i ita haramanei, Bada me au madeghana bo au marana ina nei, egha aneya au mara bo Natuna, anina, Amana tauna ava i haramanei. 33 Onavi neneghana! Matami ina kaya! Egha ota haramanei mara aiwa'i nai marana ina ghe'etai. 34 Me oroto au dobugheha e naenae ma ana numa e nenetawanei ma tau-bagibagi vibadana i verehi da ana numa hita pa'ini ma metaeta taupainina i riwei, “Ma vipa'ipa'i kauwa.” 35 “Yamna aubaina onavi neneghana taniwaga ana nememei marana aiwai, egha ota haramanei, mepa da raviraviyai, au poniwana, maratomtom bo hubahubanai. 36 Mepa da ina nememei, egha ma enoeno ma ina ravighorim. 37 Aiwa'i a ririwemi tagogina rava anatapuhi a ririwehi.” Matami ina kaya! Onavi neneghana!